Callixte Mbarushimana, wahoze ari umwe mu bayobozi bakomeye b’umutwe wa FDLR, yapfiriye mu Bufaransa. Amakuru y’urupfu rwe yatangiye gukwirakwira ku mugoroba wo ku wa 5 Ukwakira 2026, nk’uko byatangajwe n’itangazamakuru ryo mu Rwanda.
Mbarushimana yavukiye i Ndusu, mu cyahoze ari Ruhengeri, ku wa 24 Nyakanga 1963. Yari yarize ibijyanye n’ikoranabuhanga, aza gukorera Ishami ry’Umuryango w’Abibumbye rishinzwe Iterambere, UNDP, mu Rwanda.
Mu gihe cya Jenoside yakorewe Abatutsi mu 1994, yari umukozi wa UNDP i Kigali. Nyuma yaho, ibikorwa bye muri icyo gihe byaje gukorwaho iperereza, aho yashinjwaga kugira uruhare mu bikorwa byibasiraga Abatutsi ndetse no gutanga ibikoresho by’umuryango w’Abibumbye ku ngabo zahoze ari iza Leta n’imitwe yitwaje intwaro. Ibi ariko byakomeje kuba ibirego, kandi ntiyigeze ahamwa n’icyaha n’urukiko.
Nyuma ya Jenoside, Mbarushimana yagiye aba mu bihugu bitandukanye, mbere yo gutura mu Bufaransa aho yabonye ubuhungiro. Mu 2007, yabaye Umunyamabanga Nshingwabikorwa wa FDLR, umutwe witwaje intwaro wari ukorera cyane cyane mu burasirazuba bwa Repubulika Iharanira Demokarasi ya Congo.
Yigeze gutabwa muri yombi kubera ibirego by’ibyaha byo muri RDC
Ku wa 3 Ukwakira 2010, Mbarushimana yatawe muri yombi i Paris hashingiwe ku mpapuro zo kumuta muri yombi zatanzwe n’Urukiko Mpuzamahanga Mpanabyaha, ICC. Yashinjwaga ibyaha by’intambara n’ibyaha byibasiye inyokomuntu byakorewe mu ntara za Kivu mu mwaka wa 2009.
Yoherejwe i La Haye muri Mutarama 2011, ariko nyuma yaho ICC yanze kwemeza ibirego byari bimuregwaga kubera ko ibimenyetso byari bihari bitari bihagije. Yaje gusubira mu Bufaransa.
Mu Bufaransa na bwo, yari amaze imyaka ari mu rubanza rurebana n’ibirego by’uko yaba yaragize uruhare muri Jenoside yakorewe Abatutsi. Mu 2024, ubutabera bw’u Bufaransa bwari bwahagaritse iperereza buvuga ko ibimenyetso bidahagije, ariko mu 2025 urukiko rw’ubujurire rwategetse ko iperereza risubukurwa.
Kugeza ubu, amakuru y’urupfu rwe ari gutangazwa, ariko ibisobanuro birambuye ku cyateye urupfu rwe n’igihe nyirizina yapfiriye ntibiratangazwa ku buryo burambuye .
Urupfu rwa Mbarushimana rusize amateka akomeye mu bijyanye n’imanza z’abakekwaho ibyaha bya Jenoside n’ibyaha by’intambara byo mu Rwanda no mu burasirazuba bwa RDC, kuko yari umwe mu bantu bagiye bakurikiranwa n’inzego mpuzamahanga ariko ntiyigeze ahamwa n’ibirego yari akurikiranyweho.
Salongo Richard
