Umutekano mu mujyi wa Goma, mu Ntara ya Kivu y’Amajyaruguru muri Repubulika Iharanira Demokarasi ya Congo (RDC), ukomeje kuzamba, bituma abanyamakuru benshi batabasha gukora akazi kabo mu buryo busanzwe.
Umuryango mpuzamahanga uharanira ubwisanzure bw’itangazamakuru, Reporters Without Borders (RSF), watabarije abanyamakuru bakorera muri Goma, usaba amahanga n’impande zose ziri mu makimbirane kubahiriza no kurengera uburenganzira bw’abaturage bwo kubona amakuru.
RSF ivuga ko itumanaho n’abanyamakuru bari muri Goma ryagoranye cyane kubera ibibazo by’umuriro w’amashanyarazi n’internet bidahagaze neza.
Uyu muryango uvuga ko ibibazo by’itumanaho byiyongereye nyuma y’uko M23, umutwe witwaje intwaro uvugwaho gushyigikirwa n’u Rwanda, wigaruriye ibice by’ingenzi by’umujyi wa Goma. U Rwanda rwagiye ruhakana ibirego byo gushyigikira uwo mutwe.
Radiyo nyinshi zahagaritse ibiganiro
RSF ivuga ko hafi ya radiyo zose, izo muri Goma ndetse n’iz’abanyamahanga zakoreraga muri uwo mujyi, zahagaritse gutambutsa ibiganiro.
Icyicaro cy’ishami rya Radio Télévision Nationale du Congo (RTNC) muri Goma na cyo cyasizwe nta bakozi kuva ku wa 27 Mutarama.
Umuyobozi wa RTNC mu Ntara, Tuver Wundi, yabwiye RSF ko nta mukozi wa RTNC wari ukiri ku cyicaro cy’iyo radiyo.
Kubera ibyo bibazo, abaturage bo muri Goma batangiye gukurikira amakuru atambutswa na radiyo zo mu Rwanda zikorera mu mujyi wa Gisenyi, uri hakurya y’umupaka wa RDC n’u Rwanda.
Abanyamakuru basaba gutabarwa
RSF ivuga ko abanyamakuru yashoboye kuvugana na bo muri Goma bose bagaragaje ko bakeneye kuva muri uwo mujyi kubera umutekano muke.
Icyakora, icyo gihe nta nzira yizewe yo gusohoka muri Goma yari ihari.
Valéry Mukosasenge, uyobora urubuga rwa internet larepublique.net, yabwiye RSF ko ikibazo cy’umutekano cyatumaga abanyamakuru batabona uko bava muri uwo mujyi.
RSF ivuga ko abanyamakuru bakorera Radio Okapi, radiyo y’Umuryango w’Abibumbye muri RDC, ari bo bari bamaze kwimurirwa i Kigali hamwe n’imiryango yabo.
RSF irasaba impande zose kurengera abanyamakuru
RSF ivuga ko ikibazo cy’umutekano muri Goma cyashyize igitutu gikomeye ku burenganzira bw’abaturage bwo kubona amakuru.
Uyu muryango uvuga ko abanyamakuru bari bamaze amezi menshi bahungiye i Goma bavuye mu bindi bice bya Kivu y’Amajyaruguru, ariko ubu na bo bakaba bahura n’ibibazo bikomeye by’umutekano.
RSF ivuga ko hari abanyamakuru bahatiwe kuva aho bakoreraga, mu gihe abandi bagabweho ibitero cyangwa bagatotezwa.
Uyu muryango usaba impande zose ziri mu makimbirane yo muri RDC kubahiriza ubwisanzure bw’itangazamakuru, kurinda abanyamakuru no kubaha uburenganzira bwo gukora akazi kabo nta gitutu cyangwa iterabwoba.
RSF ishimangira ko no mu gihe cy’intambara abaturage bakomeza kugira uburenganzira bwo kubona amakuru yizewe, kandi ko kurengera abanyamakuru ari kimwe mu by’ingenzi mu kubungabunga ubwo burenganzira.
